ශ්‍රී ලංකා නවක පිතිකරු පැතුම් නිස්සංක සිය මංගල ටෙස්ට් තරගයේ දී ම අද සිය පළමු ටෙස්ට් ශතකය වාර්තා කිරීමට සමත් වුණා.
ඒ, බටහිර ඉන්දීය කොදෙව් කණ්ඩායම සමග පැවැත්වෙන පළමු ටෙස්ට් ක්‍රිකට් තරගයේ සිව්වන දිනයේ දී යි.
ඔහු පන්දු 252කින් ලකුණු 103ක් රැස් කළේ හතරේ පහර 6ක් සමගින්.
ශ්‍රී ලංකාව වෙනුවෙන් සිය මංගල ටෙස්ට් තරගයේ දී ම ලකුණු 100ක් වාර්තා කළ සිව්වැනි පිතිකරුවා ලෙස ද ඔහු මෙම ඉනිමත් සමග ඉතිහාසයට එක් වුණා.
මීට පෙර සිය මංගල ටෙස්ට් තරගයේ දී ශතක වාර්තා කර තිබුණේ බ්‍රෙන්ඩන් කුරුප්පු (201*), රොමේෂ් කලුවිතාරන (132*) සහ තිලාන් සමරවීර (103*) යන පිතිකරුවන් පමණයි.
සිව්වන දිනය නිමා වන විට ලකුණු 375ක ජයග්‍රාහී ඉලක්කයක් හඹා යමින් සිටි කොදෙව්වන් සිය දෙවැනි ඉනිම වෙනුවෙන් එක් කඩුල්ලක් දැවී ලබා සිටි ලකුණු සංඛ්‍යාව 34ක්.
ඉනිමේ පළමු කඩුල්ල ලෙස ජෝන් කැම්ප්බෙල් ලකුණු 11කට දවා ගැනීමට විශ්ව ප්‍රනාන්දු සමත් වුණා.
ඒ අනුව ඔවුන් තරගය ජය ගැනීම සදහා කඩුලු 9ක් අතැතිව තවත් ලකුණු 341ක් ලබා ගත යුතුයි.
සිය මංගල ටෙස්ට් ශතකය ආසන්නයටම පැමිණි නිරෝෂන් දැක්වැල්ල අවාසනාවන්ත ලෙස ලකුණු 96කට දැවී ගියා.
සිය දෙවැනි අර්ධ ශතකය වාර්තා කළ ඕෂද ප්‍රනාන්දු ලකුණු 91ක් ද, සිය 8 වැනි අර්ධ ශතකය වාර්තා කළ ළහිරු තිරිමාන්න ලකුණු 76ක් ද රැස් කළා.
ධනංජය ද සිල්වා ලකුණු 50ක් රැස් කරමින් ශ්‍රී ලංකා ඉනිම තවදුරටත් ශක්තිමත් කළ අතර, පන්දු යැවීමේ දී කොදෙව්වන් වෙනුවෙන් කෙමා රෝච් සහ රකීම් කෝන්වෝල් කඩුලු 3 බැගින් බිද හෙලුවා.
ඇන්ටීගාහි ශ්‍රීමත් විවියන් රිචර්ඩ්ස් ක්‍රීඩාංගනයේ පැවැත්වෙන මෙම තරගයේ පළමුවෙන් පන්දුවට පහරදුන් ශ්‍රී ලංකාවට සියලු දෙනා දැවී සිය ප්‍රථම ඉනිම වෙනුවෙන් ලබා ගත හැකි වූයේ ලකුණු 169ක් පමණයි.
අනතුරුව කොදෙව් පළමු ඉනිම ලකුණු 271කට සීමා කිරීමට ශ්‍රී ලංකා පන්දු යවන්නන් සමත් වුණා.
