පළමු ටෙස්ට් තරගයට සංචිතයන් නම් කෙරේ

0
366

සංචාරක බංග්ලාදේශ කණ්ඩායම සමග පැවැත්වීමට නියමිත තරග දෙකකින් යුත් ටෙස්ට් ක්‍රිකට් තරගාවලිය සදහා වන ශ්‍රී ලංකා සංචිතය ශ්‍රී ලංකා ක්‍රිකට් ආයතනය විසින් අද(20) නිල වශයෙන් ප්‍රකාශයට පත් කළා.

දිමුත් කරුණාරත්නගේ නායකත්වයෙන් යුත් සංචිතයට ක්‍රීඩකයින් 18 දෙනෙකු ඇතුළත්.

මෙම සංචිතය සදහා ද කුසල් මෙන්ඩිස් සහ කුසල් ජනිත් ඇතුළත්ව නැහැ.

ආබාධයක් හේතුවෙන් ලසිත් ඇඹුල්දෙණිය මෙම තරගාවලියට ක්‍රීඩා නොකරන අතර, ඒ අනුව ඔහු වෙනුවට නවක වමත් දග පන්දු යවන ක්‍රීඩක ප්‍රවීන් ජයවික්‍රම සංචිතයට කැදවා තිබෙනවා.

එමෙන්ම නවක වේග පන්දු යවන ක්‍රීඩක ඩිල්ෂාන් මදුෂංක මෙම සංචිතයට ද ඇතුළත් අතර, කොරෝනා වෛරසය ආසාදනය වීම නිසා නිමා වූ කොදෙව් සංචාරයට එක් වීමට නොහැකි වූ ළහිරු කුමාර ද මෙම සංචිතයට ඇතුළත්.

නිමා වූ කොදෙව් තරග සංචාරය අතරමැද පෞද්ගලික හේතුවක් මත දිවයිනට පැමිණි මැදපෙල පිතිකරු ඇන්ජෙලෝ මැතිව්ස් ද බංග්ලාදේශයට එරෙහි ටෙස්ට් තරගාවලියට නම් කර තිබෙනවා.

ශ්‍රී ලංකා ටෙස්ට් සංචිතය පහතින්,

දිමුත් කරුණාරත්න, ළහිරු තිරිමාන්න, ඕෂද ප්‍රනාන්දු, ඇන්ජෙලෝ මැතිව්ස්, දිනේෂ් චන්දිමාල්, ධනංජය ද සිල්වා, පැතුම් නිස්සංක, රොෂේන් සිල්වා, දසුන් ශානක, නිරෝෂන් දික්වැල්ල, සුරංග ලක්මාල්, ළහිරු කුමාර, අසිත ප්‍රනාන්දු, විශ්ව ප්‍රනාන්දු, ඩිල්ෂාන් මදුෂංක, වනිදු හසරංග, රමේෂ් මෙන්ඩිස්, ප්‍රවීන් ජයවික්‍රම

මේ අතර හෙට(21) ආරම්භ වීමට නියමිත පළමු තරගය සදහා වන බංග්ලාදේශ සංචිතය අද(20) ප්‍රකාශයට පත් කෙරුණා.

මොමිනුල් හක්ගේ නායකත්වයෙන් යුත් සංචිතයට ක්‍රීඩකයින් 15 දෙනෙකු ඇතුළත්.

ඊට වමත් වේග පන්දු යවන ක්‍රීඩක ශොරිෆුල් ඉස්ලාම් ද නම් කර තිබෙනවා.

ශ්‍රී ලංකාවට එරෙහි ටෙස්ට් තරගාවලිය සදහා ක්‍රීඩකයින් 21 දෙනෙකුගෙන් යුත් මූලික සංචිතයක් මීට පෙර නම් කෙරුණා.

එම සංචිතයෙන් ක්‍රීඩකයින් 15 දෙනෙකු හෙට ආරම්භ වන පළමු තරගය සදහා මෙලෙස නම් කර ඇති අතර, පළමු තරගයට නම් නොකළ සෙසු ක්‍රීඩකයින් 6 දෙනා තවදුරටත් මෙරට රැදී සිටිනු ඇති.

මේ අතර, පළමු තරගයේ දී බංග්ලාදේශ කණ්ඩායමට වේග පන්දු යවන්නන්ගේ දක්ෂතා ඉතා තීරණාත්මක වනු ඇති බවයි බංග්ලදේශ කණ්ඩායමේ නායක මොමිනුල් හක් සදහන් කර සිටියේ.

ඒ අනුව පළමු තරගය සදහා බංග්ලාදේශ කණ්ඩායම වේග පන්දු යවන්නන් තිදෙනෙකු සමග ක්‍රීඩා කිරීමට වැඩි ඉඩක් පවතිනවා.

බංග්ලාදේශ කණ්ඩායම අද දිනයේ දී පල්ලේකැලේ ක්‍රීඩාංගනයේ දී පුහුණුවීම්වල ද නිරත වූ අතර, ඔවුන් පසුගිය 12 වනදා මෙරටට පැමිණීමෙන් පසුව පල්ලේකැලේ ක්‍රීඩාංගනයේ දී පුහුණුවීම් සිදු කළ පළමු දිනය ද අදයි.

බංග්ලාදේශ ටෙස්ට් සංචිතය පහතින්,

Mominul Haque (Captain), Liton Kumar Das, Md Mithun, Mushfiqur Rahim, Tamim Iqbal Khan, Shadman Islam, Abu Jayed Chowdhury Rahi, Taijul Islam, Najmul Hossain Shanto, Mehidy Hassan Miraz, Taskin Ahmed, Ebadot Hossain Chowdhury, Mohammed Saif Hassan, Yasir Ali Chowdhury, Shoriful Islam.