පෙට්‍රල්වලට විකුණන්න සීයාගේ මුත්‍රා භාජනය සොරාගෙන

0
13

වියපත් තැනැත්තකු විසින් බඳුනකට බැහැර කරන ලද මූත්‍රා තොගයක් වෙනත් අයෙකු පෙට්රල් යැයි සිතා සොරාගත් පුවතක් ගල්නෑව පොලිස් වසමට අයත් කහල්ල පල්ලේකැලේ රක්ෂිත සීමාව අවට ගමකින් වාර්තා වේ.

අනාවරණය වන ආකාරයට සිද්ධිය මෙසේය.

නිවසේ යාමට ඒමට නොහැකි වියපත් අයෙකි. රාත්‍රියේ නින්දට යන අවස්ථාවේ දී නිතර නිතර මූත්‍රා කිරීමට එළියට යන නිසාත්, වියපත් බැවින් යාමට අපහසු නිසාත් තම දරුවන් ඔහුට කාමරයේ සිට මූත්‍රා කිරීමට භාජනයක් ලබා දි තිබුණි.

එලෙස මූත්‍රා කරන බඳුන දරු මුණුපුරන් විසින් උදේට ඉවත් කිරීමට කටයුතු කරනු ලැබේ.

ඔහුගේ දියණියක ඉකුත් දා උදේ එම බඳුන ඉවත් කිරීමට තැත් කළත්, පාරේ යන පිරිසක් දැක එකී බඳුන ඉස්තෝප්පුවේ කොනක තැබුවේ පසුව ඉවත් කිරීම සඳහාය.

ඇය වෙනත් ගමනක් පිටත්ව ගියේ එකී බඳුන එම ස්ථානයේ තිබියදීම ය.

නිවසින් බැහැරව ගොස් බසය එනතුරා මඟ රැඳී සිටි ඇයට එය සිහිපත් වුණේ ඒ අතරවාරයේය.

එම ස්ථානයේ සෙනඟ සිටි නිසා ඒ බවක් නොකියා අම්මා තම පුතු අමතා එය ව්‍යාංගාර්ථයෙන් විස්තර කළාය.

“පුතේ සීයගෙ පෙට්‍රල් ටික ඉස්තෝප්පුවේ මුල්ලක තිබෙනවා. බල්ලෙක් ඇවිත් පෙරළුවොත් අපරාදේ. ඊට කලින් එය එතැනින් ඉවත් කරන්න ” යැයි කීවාය.

අම්මා පැවසූ දේ පුතු තේරුම් ගත්තේය. ඒ වනවිට නිවසින් බැහැරව සිටි පුතු නිවසට ගොස් එය ඉවත් කරන බව කීය.

එහෙත් ඔහු නිවසට ගොස් බලනවිට එම මූත්‍රා සහිත ප්ලාස්ටික් භාජනය එහි නොතිබුණි.

ඒ ගැන සොයා බැලීමේ දී අම්මා පුතු අමතා පණිවිඩය දෙන ස්ථානයේ සිටි තෙල් අර්බුදය හමුවේ පසු වූ අයෙකු පෙට්රල් ගැනීම සඳහා පැමිණ ඇති බවටත්, බෙහෙත් බොන නිසා සීයාගේ පෙට්රල් පාටට තිබූ මූත්‍රා ටික දැඩි වෙහෙසක් දරා පැමිණි තැනැත්තා කිසිදු සැකයකින් තොරව රැගෙන ගොස් ඇති බවටත් අනාවරණය වුණා ලු.

උපුටා ගැනීම ලංකාදීප ඔන්ලයින් වෙබ් අඩවියෙනි